Mkuu wa Majeshi ya Ulinzi Tanzania , Jenerali Jacob Mkunda akimkabidhi Kikombe mshindi kutoka timu ya NMB, Bw. Abdallah Gunda kwenye mashindano ya NMB CDF TROPHY 2022, yaliyofanyika katika viwanja vya Golf Lugalo, Dar es Salaam. Kulia ni Afisa Mkuu wa Biashara na wateja Binafsi, Bw. Filbert Mponzi na kushoto ni Mkuu wa Majeshi wa Malawi, Generali Vincent Nundwe.

Mkuu wa Majeshi ya Ulinzi Tanzania, Jenerali Jacob Mkunda akimkabidhi Kikombe mshindi kutoka timu ya NMB, Bw. Sigfrid Ophishas kwenye mashindano ya NMB CDF TROPHY 2022, yaliyofanyika katika viwanja vya Golf Lugalo, Dar es Salaam. Kulia ni Afisa Mkuu wa Biashara na Wateja Binafsi, Filbert Mponzi na kushoto ni Mkuu wa Majeshi wa Malawi, Generali Vincent Nundwe.

Mkuu wa Majeshi ya Ulinzi Tanzania, Jenerali Jacob Mkunda akimkabidhi Kikombe na zawadi mshindi wa Jumla wa mashindano ya NMB CDF TROPHY 2022, Cpl ,Malius Kajuna, yaliyofanyika katika viwanja vya Golf Lugalo, Dar es Salaam. Kulia ni Afisa Mkuu wa Biashara na Wateja Binafsi, Bw. Filbert Mponzi na kushoto ni Mkuu wa Majeshi wa Malawi, Generali Vincent Nundwe.

Picha ya pamoja.

NA MWANDISHI WETU

BENKI ya NMB imemhakikishia Mkuu wa Majeshi ya Ulinzi Tanzania (CDF), Jenerali Jacob Nkunda, udhamini endelevu wa Mashindano ya Gofu ya Mkuu wa Majeshi (NMB CDF Trophy), ambayo ni sehemu ya maadhimisho ya kuzaliwa kwa Jeshi la Wananchi Tanzania (JWTZ).

Ahadi hiyo imetolewa na Afisa Mkuu wa Biashara na Wateja Binafsi wa NMB, Filbert Mponzi, wakati wa hafla ya utoaji zawadi kwa washindi wa NMB CDF Trophy 2022, iliyofanyika katikaVviwanja vya Gofu Lugalo jijini Dar es Salaam, ambako kwa siku mbili wakali wa mchezo huo wapatao 243 walichuana.

Hafla hiyo ilihudhuriwa pia na Mkuu wa Majeshi Mstaafu Tanzania Jenerali George Waitara na Mwenyekiti wa Klabu ya Gofu Lugalo, Brigedia Jenerali Michael Luwongo (Mstaafu), pamoja na Mkuu wa Majeshi wa Malawi, Jenerali Vicent Nundwe, aliyeambatana na nyota wa timu za Jeshi la Malawi.

Awali akiwasilisha salamu za Afisa Mtendaji Mkuu wa NMB, Ruth Zaipuna na Mwenyekiti wa Bodi, Dk. Edwin Mhede, Mponzi alimpongeza Jenerali Nkunda kwa kuaminiwa na Rais Samia Suluhu Hassan na kuteuliwa, na kuahidi kumuunga mkono ili kutekeleza majukumu yake kwa ufanisi.

“Kwa kutambua umuhimu wa mchezo wa gofu, lakini pia mahusiano ya NMB na JWTZ, tumeona umuhimu wa kuendelea kudhamini mashindano haya ya Mkuu wa Majeshi na tumefanya hivyo kwa miaka sita sasa. Mwaka huu katika CDF Trophy, NMB imetoa shilingi milioni. 60 za kugharamia zawadi na vifaa mbalimbali. 

“Nikuahidi CDF Nkunda, NMB tukiwa benki ya kizalendo, benki ambayo Serikali ina hisa za kutosha na ukweli kuwa sisi ni wadau wakubwa wa Serikali na kwa kutambua umuhimu wa JWTZ, tutaendelea kudhamini CDF Trophy kwa miaka mingi ijayo.

Aliongeza “Kwa hiyo, mnapaswa kutambua kwamba mtakuwa na sisi kwa miaka mingi ijayo katika mashindano haya, ambayo tumeyasapoti majeshi yetu katika mashindano mengi inayoshirikisha timu za majeshi yetu kitaifa na kimataifa,” alisisitiza Mponzi.

Aidha, Mponzi pia aliahidi kugharamia ununuaji wa viatu na jezi kwa ajili ya watoto walioshiriki mashindano hayo, baada ya kupokea ombi kutoka kwa kocha wa vijana hao.

“Jioni wakati tunakabidhi zawadi za watoto (juniors),kocha alilalamika vijana wake kukosa viatu, nasi NMB tukalichukua hilo, baada ya kuambiwa Sh. Milioni 5 zinatosha kuwezesha vijana wale kupata viatu na jezi ili kuwachagiza kushiriki kwa ufanisi mchezo huu na kupata mafanikio,” alisema.

Mponzi alitumia nafasi hiyo kumueleza Generali Nkunda kuwa NMB inayo Matawi Maalum kadhaa nchini kwa ajili ya maofisa ‘private banking’ na kwamba kwa Dar es Salaam, wana matawi ya Oyster Plaza na Makao Makuu, hivyo kuwakaribisha majenerali wa jeshi na maofisa wengine kufika kuhudumiwa.

Kwa upande wake, Jenerali Nkunda alianza kwa kuipongeza na kuishukuru NMB kwa kudhamini uliofanikisha mashindano hayo kwa kiwango cha kimataifa,  huku akisisitiza kuwa matumaini yake ni benki hiyo kuendelea kuisapoti JWTZ na kuiunga mkono Serikali.

“Nimefurahishwa na udhamini wa NMB kwa mwaka wa sita mfululizo sasa, hii inaonesha na kuthibitisha ni kwa namna gani NMB ilivyo karibu na JWTZ, lakini pia inatumia fursa hiyo kurudisha fadhila kwa jamii.

“Nitoe wito kwa taasisi za Serikali na mashirika mengine kuiga mfano wa NMB na wadhamini wengine katika kushirikiana na jeshi kwa kudhamini mashindano haya na pia kusaidia ushiriki wa timu za majeshi katika Mashindano ya Majeshi ndani nan je ya nchi,” alisisitiza. 

Generali Nkunda aliongeza kuwa NMB CDF Trophy ni shindano lenye historia ndefu na umuhimu wa kipekee katika historia ya JWTZ, na kufichua kuwa baada ya uteuzi wake, alikabidhiwa ulezi wa timu na mtangulizi wake Mkuu wa Majeshi Mstaafu, Venance Mabeyo, huku akiahidi kuyaboresha ili kuyaongezea mvuto.

“CDF Trophy ni shindano la kuadhimisha kuzaliwa kwa JWTZ, ambayo huwa ni Septemba 1 kila mwaka, lakini mwaka huu kutokana na sababu mbalimbali likasogezwa mbele. Tunamshukuru Mwanzilishi Jenerali Waitara na walioliendeleza, kwani JWTZ ni kisima cha kuendeleza michezo,” alibainisha.

Jenerali Nkunda alimpongeza CDF wa Malawi, Vicent Nundwe kwa kuacha majukumu yake na kuja kushiriki CDF Trophy 2022 yeye na timu za maofisa wa Jeshi la Malawi, ushiriki ambao umeliongezea shindano hilo hadhi kimataifa.

Katika mashindano hayo yaliyoanza Oktoba 1, Koplo Marius Kajuna aliibuka mshindi wa jumla wa CDF Trophy, yaliyohusisha kategori za ‘Combat Competition,’ ‘Professional,’ ‘Main Event CDF Trophy,’ ‘Juniors’ na ‘Sponsors Competition,’ ambako Abdallah Gunda wa NMB aliwagaragaza wadhamini wengine.

Waziri Mkuu Kassim Majaliwa pamoja na Afisa Mtendaji Mkuu wa NMB, Ruth Zaipuna (kulia) wakimkabidhi Afisa Mtendaji Mkuu wa hospitali ya CCBRT, Brenda Msangi mfano wa hundi yenye thamani ya Sh. Mil. 600 wakati wa mbio za hisani za NMB Marathon 2022 ‘Mwendo wa Upendo’ kwa ajili ya kusaidia matibabu ya akinamama wenye Fistula wanaotibiwa katika hospitali ya CCBRT. Mbio ziliandaliwa na Benki ya NMB zilianzia na kuishia kwenye viwanja vya Leaders Kinondoni jijini Dar es Salaam, mwishoni mwa wiki. Kushoto ni Mwenyekiti wa Bodi ya NMB, Dk. Edwin Mhede. (NA MPIGA PICHA WETU).

Waziri Mkuu Kassim Majaliwa (katikati) akiongoza mbio hisani za NMB Marathon 2022 ‘Mwendo wa Upendo’ zilizoanzia na kuishia kwenye viwanja vya Leaders Kinondoni jijini Dar es Salaam. Mbio hizo zilizoandaliwa na Benki ya NMB, zililenga kukusanya kiasi cha Sh. Mil. 600 za kusaidia matibabu ya akinamama wenye Fistula wanaotibiwa katika hospitali ya CCBRT. Kulia ni Afisa Mtendaji Mkuu wa NMB, Ruth Zaipuna na wa pili kulia ni Mwenyekiti wa Bodi ya NMB, Dk. Edwin Mhede. 

 Na Mwandishi Wetu

Waziri Mkuu, Mhe. Kassim Majaliwa (kulia) akijadiliana jambo na wafanyakazi wa Benki ya NMB alipotembelea banda hilo kwenye maonesho ya Jukwaa la mwaka la Mashirika yasiyo ya Kiserikali lilolofanyika Jijini Dodoma. Benki ya NMB ni mmoja wa wadau wa jukwaa hilo. 

Na Mwandishi Wetu

Mashirika yasiyo ya kiserikali nchini yameagizwa kufungua akaunti zao katika benki za nchini na kitendo hicho kimetajwa kama ni sehemu ya uzalendo.

Wito huo ulitolewa na Waziri Mkuu, Mhe. Kassim Majaliwa wakati akizungumza na wananchi na watumishi wa Benki ya NMB alipotembelea banda la benki hiyo katika kilele cha Jukwaa la Mwaka la mashirika yasiyo ya kiserikali.

Waziri Mkuu alitembelea NMB kuanza mazungumzo na mashirika yasiyo ya kiserikali kote nchini ili kuwafungulia akaunti ndani ya benki hiyo ambayo ina matawi 228 nchi nzima na kusema mpango huo mbali na kuonyesha uzalendo, lakini itasaidia kuongeza mzunguko wa fedha ndani ya nchi, jambo litakalotafsiriwa kama kitendo cha kizalendo.

Meneja Mwandamizi wa Mahusiano wa benki ya NMB, Bi. Dorah Monyo alisema utaratibu wa kuweka fedha kwa benki za ndani utakuwa na faida kubwa kwa wananchi kwani mzunguko wa fedha unabaki ndani na kumuahidi kuwa NMB itakuwa benki ya kwanza kusaidia mashirika hayo kuwa na akaunti ndani ya benki na zenye uendeshaji wa gharama nafuu.

Mwenyekiti wa Mtandao wa Mashirika yasiyokuwa ya Kiserikali, Dk Lilian Badi alisema ni wakati kwa taasisi binafsi kuwekeza fedha zao kwa mabenki ya nyumbani ili kuchangia ukuaji wa uchumi.Lakini pia, aliiomba Serikali kuzipa nafasi taasisi zisizo za kiserikali ikiwemo kuwapa uhuru wa kufanya majukumu yao kwan kwa sasa wamebanwa hasa kipengere cha usajili wa miaka 10 kwani kinawakosesha nafasi ya kujadiliana na wadau kuhusu miradi mikubwa.

Na Salma Lusangi

Waziri wa Maji, Nishati na Madini Zanzibar Shaibu Hassan Kaduara ameagiza Mamlaka ya Maji Zanzibar (ZAWA) kuwatafuta na kuwachukulia hatua mafundi wa maji wa mitaani ambao wanaunga maji kwa wananchi kinyume na Sheria zilizoekwa na Wizara yake.

Akizungumza katika kikao na uongozi pamoja na wafanyakazi wa ZAWA huko Gombani, Pemba mwishoni mwa wiki aliwataka watendaji hao kuwatambua  wateja wao pamoja na kuwasaka mafundi wa maji wa mitaani ambao wanaunga maji kwa watu kinyume na Sheria.Alisema Wizara ya Maji, Nishati na Madini kupitia taasisi yake ZAWA imeshatoa muongozo kwamba watu wanaohitaji kuungiwa maji wafike katika ofisi hiyo kwaajili ya kujisajili.“ ZAWA hamuwajui wateja wenu, hamuwatambui mafundi wa mitaani! Mapato ya maji yanapotea kwasababu hamjawajibika ipasavyo. 

ZAWA watambueni wateja wenu, mafundi wa mitaani wanaowaungia watu maji kinyume na sheria ”. Alisema kaduaraPia alisisitiza umuhimu wa ZAWA kujipanga katika kukusanya mapato ya maji. Alisema endapo taasisi hiyo itajipanga vizuri katika ukusanyaji wa mapato basi wataweza kujilipa mishara mizuri sana na fedha zingine zitabakia.

 “Mkisimamia mapato vizuri basi mnaweza kujilipa mishara na pesa ya chenji zitabaki, simamieni mapato vizuri, kwani siku za nyuma makusanyo yalikua yanaenda vizuri, Mji wa Wete tu, mkisimamia vizuri basi mapato yataongezeka” Alielezea Kaduara.Aidha Waziri huyo alikemea tatizo la uwepo wa makundi ndani ya ofisi, ununuzi wa vifaa ambavyo sio sahihi kwa maana ya kutokua na vigezo vinavyotakiwa.

 Pamoja na kuwataka watendaji hao kusameheana endapo mtu amekwanzana na mtumishi mwenzake. Alisema kwani bila ya kusameheana watendaji hao hawataweza kufanya kazi kwa pamoja na kufikia malengo yaliyokusudiwa. 

Naye Katibu Mkuu wa wizara hiyo Joseph Kilangi aliwakumbusha watendaji hao nidhamu ya kazi, lugha nzuri kwa wateja  wao, umuhimu wa kusimamia matumizi sahihi ya fedha kwa kufuata mfumo uliyowekwa na Serikali, pamoja  na kuwahimiza kujibu hoja za Mdhibiti na Mkaguzi Mkuu wa Serikali (CAG) haraka.Pia aliwataka watendaji hao kuwa wabunifu wa kubuni miradi ya maendeleo ambayo italeta tija kwa Serikali na wananchi. Alielezea kwamba kuna baadhi ya Idara/Taasisi hazina miradi.

Aidha Katibu Mkuu huyo aliwataka mafundi wa ZAWA wasifunge mota za maji bila ya kushirikiana na wataalamu wa Shirika la Umeme Zanzibar (ZECO) kwa sababu mota zinaungua, hivyo Serikali inapata hasara zaidi ya milioni mia tano.“Wizara yetu inamgusa kila mtu tujitahidi kuzuia malalamiko na kuzuia malalamiko hayo  ni kuwajibika, nidhamu, sisi tuliyopo ofisini tunatakiwa tutowe ripoti ya miaka miwili ya uongozi wa Rais Zanzibar Dkt Hussein kwa kuangalia ilani, hivyo timu iliyopo chini ya Afisa Mdhamini Pemba itekeleze wajibu wao” Alisema Kilangi.

             

Na Victor Masangu,Pwani 

Kamishina wa Idara ya Mipango ya Kitaifa Wizara ya Fedha na Mipango, Dkt. Mursali A.Milanzi akizungumza na Washiriki wa Mafunzo ya matumizi ya Mfumo wa Kitaifa wa Kusimamia Miradi ya Maendeleo - National Project Management Information System (NPMIS) yanayofanyika Jijini Arusha.

Na Ramadhani Kissimba,WFM - Arusha

Serikali kupitia Wizara ya Fedha na Mipango imekuja na suluhisho la tatizo lililokuwa linasababisha baadhi ya Miradi ya Maendeleo kuchelewa kutekelezwa kutokana na sababu mbalimbali ikiwemo mlolongo mrefu uliokuwepo katika hatua za awali za utekelezaji wa miradi hiyo.

Hayo yamesemwa na Kamishina wa Idara ya Mipango ya Kitaifa Wizara ya Fedha na Mipango, Dkt Mursali Milanzi wakati akifungua mafunzo ya matumizi ya Mfumo wa Kitaifa wa Kusimamia Miradi ya Maendeleo - National Project Management Information System (NPMIS) yanayofanyika Jijini Arusha.

Dkt. Milanzi amesema kuwa Wizara ya Fedha na Mipango pamoja na wadau wengine kwa muda mrefu wamekuwa wakikabiliana na changamoto mbalimbali wakati wa uratibu au utekelezaji wa miradi na programu za maendeleo changamoto ambazo zimekuwa zikipelekea kupunguza kasi ya utekelezaji na ufuatiliaji wa miradi mbalimbali nchini.  

‘’Napenda kuchukua nafasi hii kuelezea kwa ufupi baadhi ya changamoto ambazo Wizara ya Fedha na Mipango na wadau wengine wanaoratibu au kutekeleza miradi na programu za maendeleo wamekuwa wakikabiliana nazo kwa muda mrefu ikiwemo, barua za miradi mipya na inayoendelea kupokelewa bila kuwa na viambatisho muhimu vya nyaraka za miradi, baadhi ya viambatisho kuwa vikubwa na kushindwa kuingizwa kwenye majalada na upatikanaji usioridhisha na usio wa haraka wa taarifa za miradi pindi zinapohitajika’’. Alisema Dkt. Milanzi.

Dkt. Milanzi aliongeza kuwa katika kutatua changomoto hizo, Wizara ya Fedha na Mipango kwa kushirikisha wadau mbalimbali imeona ije na suluhisho kwa kuanzisha Mfumo utakaohusika moja kwa moja na Utekelezaji wa Miradi na Programu za Maendeleo nchini, Mfumo ambao umezingatia mahitaji ya wadau wote na utendaji kazi wa majukumu ya kila mdau nchini katika uratibu na utekelezaji wa miradi na programu za maendeleo.

Aidha, Dkt. Milanzi alisema kuwa kuna umuhimu wa Mfumo huu kuanza kutumika ipasavyo na ndio maana Wizara ya Fedha na Mipango ikaandaa Waraka wa Hazina Na.5 wa mwaka 2020/21 kuhusu matumizi ya Mfumo wa Kitaifa wa Kusimamia Miradi ya Maendeleo na Waraka wa Hazina Na. 1 Kuhusu Utekelezaji wa Bajeti ya Serikali kwa Mwaka 2022/23 unaosisitiza uzingatiaji na utekelezaji wa Mfumo huu.

Awali akizungumza katika ufunguzi wa mafunzo hayo Mkurugenzi wa Usimamizi wa Mifumo ya Fedha kutoka Wizara ya Fedha na Mipango, Dkt. John Sausi amesema lengo la uanzishwaji wa Mfumo huo ni kutaka Serikali kuwa na orodha ya Miradi yote inayoitekeleza na kuwa na taarifa sahihi ya miradi hiyo.

Dkt. Sausi aliongeza kuwa Serikali itaendelea kuuboresha mfumo huu kulingana na mahitaji ya wadau na kuwaomba washiriki na wadau wote wanaotumia Mfumo huo kuendelea kutoa maoni yatakayosaidia kurahisha utendaji kazi wa Mfumo huo.

Pia kwa kumalizia Kamishina wa Idara ya Mipango ya Kitaifa, Dkt. Milanzi alisema kuwa utumiaji wa Mfumo wa Kitaifa wa Kusimamia Miradi ya Maendeleo – National Project Management Information System (NPMIS) utasaidia kuongeza ufanisi kwenye uibuaji, upangaji, uwasilishaji, uchambuzi, utekelezaji, ufuatiliaji na tathmini ya Miradi ya Maendeleo, pamoja na kurahisisha utunzaji wa kumbukumbu za Miradi ya Maendeleo iliyopo katika hatua mbalimbali za mzunguko wa utekelezaji wa miradi (Project cycle).

Mafunzo hayo ya matumizi ya Mfumo wa Kitaifa wa Kusimamia Miradi ya Maendeleo yanahudhuriwa na washiriki 58 ambapo washiriki 26 wanatoka katika Ofisi za Tawala za Mikoa na  Serikali za Mitaa na Watumishi 32 kutoka katika Wizara, Ofisi ya Mwanasheria Mkuu wa Serikali pamoja na Ofisi ya Msajili wa Hazina.

Na Munir Shemweta, WANMM DODOMA

Wzairi wa Ardhi Nyumba na Maendeleo ya Makazi Dkt Angeline Mabula ameagiza ufanyike upembuzi kawa mashauri yote ya ardhi yaliyokaa muda mrefu kutokana na sababu zisizo na mashiko.

Amemtaka Msajili wa Mabara ya Ardhi na Nyumba ya Wilaya Stella Tullo kusimamia agizo hilo kwa kumpatia taarifa mapema mwezi Novemba 2022.

Aidha, alimtaka Katibu Mkuu wa Wizara ya Ardhi Nyumba na Maendeleo ya Makazi kuangalia kwa jicho la tatu Mabaraza yote ya Ardhi ya mkoa wa Dar es Salaam kwa kuwa kumekuwa na malalamiko mengi ya mlundikanao wa kesi za muda mrefu.

Dkt Mabula alitoa agizo hilo Oktoba 6, 2022 wakati wa Kikao kazi cha Kitengo cha Mabaraza ya Ardhi na Nyumba ya Wilaya na Chama cha Wanasheria Tanganyika (TLS) kilichofanyika jijini Dodoma.

Dkt Mabula alisema, serikali inatambua umuhimu na michango ya mawakili katika kuvisaidia vyombo vya utoaji haki na kuwakumbusha mawakili suala la maadili ya kiutendaj hasa kwa baadhi ya wajumbe kutoka Chama cha Wanasheria Tanganyika (TLS).

Kwa mujibu wa Dkt Mabula, uzoefu unaonesha mashauri mengi yanayowakilishwa na mawakili ndiyo yenye kuchukua muda mrefu kumalizika.

‘’Mshauri mengi ya ardhi katika mabaraza hayapewi kipaumbele na Wakili anaweza kupanga tarehe ya kesi ambayo kwa siku hiyo ana mashauri katika vyombo vingine vya kutoa haki ‘’

Waziri wa Ardhi aliongeza kwa kusema kuwa, uchunguzi wa awali unaonesha pia baadhi ya mapingamizi yana dhamira ya kupoteza muda hususan yale mashauri yanayohusu taasisi za fedha.

‘’Mashauri mengi yanayofunguliwa na wananchi walioshindwa kurejesha mikopo  kwa wakati au kukiuka mikataba ya mikopo, wananchi wanakimbilia kwenye mabaraza kwa kushauriwa na mawakili’’. Alisema Dkt Mabula

Kwa mujibu wa Dkt Mabula, ucheleweshaji mashauri kwa sababu zozote zile ni kuchelewesha kupata haki kwa wakati na kutoa rai kwa mawakili kuona umuhimu wa kuunga mkono juhudi za serikali kwa kutumia nafasi zao kama maafisa wa mahakama kwa nia ya kuhakikisha mashauri ya ardhi yanamalizika kwa wakati na kwa haki kwa ajili ya maendeleo ya taifa.

Kwa upande wake Katibu Mkuu Wizara ya Ardhi Nyumba na Maendeleo ya Makazi Dkt Allan Kijazi alisema, wizara yake imeitisha kikao cha pamoja na mawakili wa kujitegemea kwa lengo la kuhakikisha mashauri ya ardhi katika mabaraza yanasikilizwa na kumalizwa kwa wakati.

‘’Mawakili wa kujitegemea mnapotekeleza kwa uadilifu uaminifu na weledi jukumu lenu la kuwakilisha wananchi katika mashauri mnawarahisishia wenyeviti wa mabaraza ya ardhi kazi ya kusikiliza na kutoa maamuzi kwa wakati kwani uwakilishi wenu kwa namna moja ama nyingine unatoa dira mapema ya kufahamu mwananchi yupi ana haki na yupi hana haki katika shauri husika’’ alisema Dkt Kijazi.

Kikao Kazi cha Kitengo cha Mabaraza ya Ardhi na Nyumba ya Wilaya na Chama cha Wanasheria Tanganyika (TLS) kina lengo la kupata uelewa wa pamoja, kupokea changamoto wanazokutana nazo katika mabarza ya ardhi pamoja na kuimarisha ushirikiano baina ya Wizara na TLS katika kutatua kero za wananchi nwenye mashauri ya ardhi.

Naibu katibu Mkuu Wizara ya Fedha na Mipango Bi. Jenifa Omolo, akimkabidhi Meya wa Manispaa ya Moshi Mjini, Mhe. Mhandisi Zuberi Kidumo, nyaraka za umiliki wa kituo cha afya Moshi-Arusha katika hafla ya makabidhiano iliyofanyika mjini Moshi mkoani Kilimanjaro. Katikati ni Mganga Mkuu wa Mkoa wa Kilimanjaro, Dkt. Jairy Khanga.

Na Saidina Msangi, WFM, Kilimanjaro

Serikali imekabidhi kituo cha Afya Moshi-Arusha pamoja na mali mbalimbali ikiwemo kiwanja na majengo vyenye thamani ya Shilingi bilioni 4.3 kwa Manispaa ya Moshi ili iweze kukiendeleza kwa kutoa huduma za afya kwa wananchi wa manispaa hiyo na maeneo ya jirani. 

Makabidhiano ya kituo hicho yamefanyika katika Manispaa ya Moshi mkoani Kilimanjaro kati ya Naibu Katibu Mkuu Wizara ya Fedha na Mipango Bi. Jenifa Omolo na Meya wa Manispaa ya Moshi, Mhe. Mhandisi Zuberi Kidumo.

Akizungumza katika hafla ya kukabidhi kituo hicho, Bi. Omolo alisema kuwa Serikali inakabidhi kituo hicho pamoja na mali zake zote kwa manispaa hiyo ili iweze kutoa huduma kwa wananchi.

‘’Pamoja na majengo tunakabidhi mali nyingine ikiwemo samani352, mitambo 70 na gari moja vyenye thamani ya Sh.milioni 94.21, mali chakavu zenye thamani ya Sh. 280,000, bunduki, bakaa za benki zilizoishia Julai 2022, madai ya kodi ya pango yenye thamani ya shilingi milioni 1.2 namadai kwa taasisi za bima za afya yenye thamani ya Sh. milioni 32.4,’’alisema Bi. Omolo.

Pia ilikabidhi madeni yenye nyaraka yenye thamani ya Sh. milioni 610.3na yasiyo na nyaraka zinazojitosheleza yenye thamani ya sh.milioni 71.9 na ufuatiliaji wa mauzo ya magari mawili yenye thamani ya Sh.milioni 2.3.

Aidha, Bi. Omolo alimtaka Mkurugenzi wa Manispaa ya Moshi kuhakikisha kuwa kituo hicho kinafanyiwa maboresho ili kirejeshewe hadhi yake ya Hospitali na kuendelea kutoa huduma kwa wananchi wa manispaa hiyo na maeneo ya Jirani.

Alimtaka Mkurugenzi huyo kufuatilia taratibu za kuhamisha umiliki kwa kumshirikisha Kamishna wa Aridhi na kufuatilia nyaraka zilizokosekana za madai ya watumishi pamoja na kuchukua hatua stahiki kwa watumishi waliyojimilikisha mali za kituo hicho kinyume na sheria.

Aidha alisisitiza kuwa jukumu la kulinda mali za Serikali ni la wote, na kuelekeza kuwa baada ya makabidhiano mali zote ziingie kwenye daftari la mali za Serikali ambalo limeboreshwa na kuliweka katika mfumo wa kielektroniki wa usimamizi wa mali za Serikali ujulikanao kama GAMIS.

Naye Mkurugenzi wa Idara ya Usimamizi wa Mali za Serikali Wizara ya Fedha na Mipango Bw. Chotto Sendo, alisema kuwa uhakiki wa mali na madeni ya kituo hicho umekamilika na Serikali kwa kutambua umuhimu wa kituo hicho imeamua kikikabidhi kwa Manispaa ya Moshi ili iweze kukiendesha kuhudumia wananchi.  

‘’Lengo ni kutoa huduma kwa wananchi kwa hiyo Serikali imeamua kurejesha kituo hicho Serikalini kwa Manispaa ya Moshi ili wananchi waendelee kupata huduma za kiafa katika kituo hiki’’ alisema Bw. Sendo.

Naye Kaimu Mkurugenzi Msaidizi Idara ya Ubinafsishaji, Ufuatiliaji na Tathmnini kuitoka Ofisi ya Msajili wa Hazina Bw. Abissay Ndaki, alisema kuwa hospitali hiyo imerejeshwa Serikalini kwa jina la Msajili wa Hazina wakati taratibu nyingine zikiendelea kufanyika na kuishukuru Serikali kwa kuridhia kurejesha kituo hicho kwa Manispaa ya Moshi ili kiweze kuendelea kutoa huduma kwa wananchi.

Naye Mbunge wa Moshi Mjini Mhe. Priscus Tarimo, ameishukuru Serikali ya awamu ya Sita chini ya Uongozi wa Mhe. Rais Samia Suluhu Hassan kwa kuwezesha manispaa hiyo kupatiwa kituo hicho ili kuweza kutoa huduma kwa wananchi wake na kuboresha upatikanaji wa huduma za kiafya.

Kituo cha afya Moshi/Arusha kilianzishwa mwaka 1973 kama utekelezaji wa agizo la Serikali kwa mashirika ya Umma Na.2/46/050 la tarehe 17 Novemba, lililotaka mashirika ya Umma yanayohusika na viwanda kutoa huduma za tiba na kinga pamoja na huduma za kuzuia na kutibu madhara yanayotokana na mazingira ili kuboresha afya za wafanyakazi.

Majengo ya Kituo hicho yalijengwa kwa ufadhili wa Serikali ya Uholanzi na kituo kikikiwa na hadhi ya Hospitali huku kikitegemea michango ya wenye viwanda vilivyopo Moshi na Arusha wakati huo ili kukiendesha.

Hata hivyo miaka ya 1990 baada ya viwanda hivyo kushindwa kujiendesha kulisababisha Wizara ya Afya kuishusha Hospitali hiyo kuwa Kituo cha Afya.

Na Dotto Mwaibale,Singida

SERIKALI katika kipindi cha mwaka wa fedha wa 2023/2024 inatarajia kutenga Sh.Bilioni 4.6 kwa ajili ya kununua zana za kilimo Mkoa wa Singida. 

Waziri wa Kilimo Hussein Bashe ameyasema hayo kwenye kikao cha kupanga mkakati wa kuongeza uzalishaji wa zao la alizeti kilicho washirikisha mkuu wa mkoa, wakuu wa wilaya, wenyeviti na wakurugenzi wa halmashauri pamoja na maafisa kilimo ambacho kiliketi leo Oktoba 5, 2022 katika Ukumbi wa Ofisi ya Mkuu wa Mkoa. 

Alisema Serikali baada ya kununua zana hizo halmashauri zitatakiwa zitenge maeneo maalumu ambapo zana hizo zitawekwa na kutakuwepo mtu maalum wa kuzisimamia na  wakulima watakuwa wakienda kukodisha. 

Alisema fedha zitakazopatikana baada ya wakulima kukodi zana hizo zitarudishwa Serikalini na kwenda kununua zana hizo katika mikoa mingine. 

Awali akitoa mchanganua wa bajeti ya ununuzi wa zana hizo Mkurugenzi wa Halmashauri ya Wilaya ya Ikungi ambaye ni mwenyekiti wa kamati ya mkakati ya kuongeza uzalishaji wa zao hilo Justice Kijazi alisema Halmashauri za Wilaya za Ikungi,Mkalama, Iramba na Itigi kila moja zitahitaji zana zenye thamani ya Sh.706 Milioni. 

Alisema Halmashauri ya Wilaya ya Manyoni itahitaji Sh.791Milioni huku Singida DC ikiwa ni Sh.309 Milioni. 

Akizungumzia kuhusu mpango mkakati wa zana hizo Kijazi alisema ni kuimarisha upatikanaji wa zana bora za kilimo, mkoa unaboresha mazingira ya uwekezaji ili kuvutia wawekezaji wa zana za kilimo, kuanzisha vituo vya umahiri wa zana (Agricultural mechanization hub) kwa kushirikiana na Wizara ya Kilimo. 

Alitaja mkakati mwingine kuwa ni kuwaelimisha wakulima kuhusu mikopo ya kibenki yenye lengo la upatikanaji wa zana bora za kilimo kwa masharti nafuu na Mfuko wa Pembejeo (AGITF) uwezeshe wakulima upatikanaji wa mikopo nafuu ya zana za kilimo mkoani hapa. 

Mkuu wa Mkoa wa Singida, Peter Serukamba alisema mkoa umejipanga kusimamia kilimo ili kiwe sababu ya kuondoa umasikini kwa wananchi. 

“Mheshimiwa Waziri napenda kukuhakikishia kuwa hapa Singida kazi kubwa ni kilimo tutakifanya usiku na mchana ili tuweze kuwasaidia wananchi wetu na maelekezo yako yote tutayafanyia kazi” alisema Serukamba. 

Serukamba alisema awali watu walidhani kuwa kilimo ni jambo la kawaida na la mtu binafsi lakini sasa ni biashara na mkombozi kwa wananchi na kuwa wanazipongeza jitihada zote zinazofanywa na Serikali za kuinua kilimo na wao kama mkoa wanaziunga mkono na kutekeleza maagizo yote waliyopewa.

Na John Marwa

KOCHA Mkuu wa klabu ya Yanga SC Nasriddine Nabi ametamba kuelekea mchezo wa mkondo wa kwanza wa Ligi ya Mabingwa Afrika CAFCL dhidi ya Al Hilal ya Sudan.

Na Mwandishi Wetu

Kamati ya Sheria na Hadhi za Wachezaji ya Shirikisho la Mpira wa Miguu Tanzania (TFF) imezifungia kusajili klabu za Ligi Kuu ya NBC za Tanzania Prisons na Singida Big Stars kwa kosa la kusajili wachezaji wenyewe mikataba na klabu nyingine.

Kwa mujibu wa Taarifa iliyotolewa na TFF imeeleza kuwa klabu hizo hazitaruhusiwa kusajili kwa dirisha Moja la usajili.

"Uamuzi wa Kamati ya Sheria na Hadhi za Wachezaji umefanywa kwa kuzingatia kanuni ya 47(21)  ya Ligi Kuu baada ya kuzikuta na kosa hilo. Adhabu hiyo ni kwa dirisha moja la usajili."

"Tanzania Prisons ilimsajili kipa Musa Mbise wa Coastal Union wakati ikifahamu kuwa bado ana mkataba klabu hiyo. Nayo Singida Big Stars ilimsainisha mkataba Kipa Metacha Mnata huku akiwa bado ana mkataba na Polisi Tanzania." Imeeleza taarifa hiyo na kuongeza kuwa.

"Kamati ya Sheria na Hadhi za Wachezaji inazikumbusha klabu zote nchini kuwa usajili wa wachezaji unafanywa kwa kuzingatia kanuni, na ambazo zitakiuka kanuni zitachukuliwa hatua kwa mujibu wa kanuni." Imeeleza taarifa hiyo.

Na John Marwa

'Kila mlango na ufunguwo wake' ni kiswahili tu na nahau zake, kiswahili tu na ubantu wake. Ndio hakuna fundi wa kutengeneza milango kwa funguwo moja bali kila mmoja unawake, kama mwili wa biandamu na moyo wake.

Kama amabavyo siku moja ina masaa 24, kwa nini wiki moja isiwe na siku 24 ama mwaka mmoja uwe na miezi 24 kwa sababu kila mlango nafunguwo yake. Ni kama mbio na umbali wake ndio huleta madaraja.

Leo Wananchi jogoo kawika kawakumbusha kuwa kumekucha na siku ndio hii ya kwenda kufungua mlango uliojifunga kwa miaka 24, yaani mwaka mmoja kabla ya Taifa kumpoteza Mtanzania namba moja na mwasisi wa Taifa hili Mwalimu Julius Kambarage Nyerere.

1998 Mwaka huu alizawa mdogo wangu kipenzi Paschalia, leo ana miaka 24 na yuko pale KCMC anamalizia shahada yake ya Udaktari. Funguwo hamjaipata tu!

Bahati mbaya ni Mwananchi mwenzenu lakini tangu azaliwe hadi leo hajawahi kusikia mko makundi Ligi ya Mabingwa Afrika (CAFCL), Na shaka yangu asije anza kujitibia yeye badala ya kuwatibia ninyi  Moyo wake.

Labda Kipendacho Moyo ni dawa, lakini siamini hii hali mnaipenda, na kama mnaipenda haijawatibu maradhi yenu japo dawa yake mwaijua imejificha kwenye miaka 24. (Tuseme Mwananchi Dozi24)

Sitaki kuwasemea kwa ndugu yenu wa damu japo mnampopoa lakini yeye fungo yake kaifanya iwe 'Kawaida ni kama Sheria' ndio acha tuendelee na Mwananchi Dozi24 hii ndio tiba yenu hii ndio funguwo yenu kufika makundi Ligi ya Mabingwa Afrika Msimu huu.

Mwananchi Dozi24 mnawakumbuka Asec Mimosa, Manning Rangers na Raja Casablanca? hawa ndio chanzo Cha Mwananchi Dozi24, hawa ndio walishindwa kuwaambia kwa nini siku ina masaa 24 na wiki ina siku saba.

Asec Mimosa alikuwa bingwa kutoka kwenye kundi lenu ambalo mlishika mkia, tulizeni akili zenu hapa ndipo mlipo usahau ufunguwo wa Mwananchi Dozi24.

Yaani kumbukeni vizuri mlicheza na bingwa wa msimu wenu lakini hamkurudi tena hadi leo! Mwananchi Dozi24 amka kumekucha Lupaso panakuita funguwo Iko mikononi mwenu.

Kaujazeni Uwanja, kaionyesheni Afrika mmeipata funguo, msiwaonyeshe Nasreddine Nabi, msiwaonyeshe Fiston Mayele waonyeshe Mwananchi Dozi24 yenye funguo za kutinga makundi na sio kuwa na Azizi Ki.

Kuna Methali ya waswali inasema 'Ikiwa hujui kufa tazama kaburi' Mwananchi ikiwa mmesahu machungu ya kutocheza CAF CL hatua ya makundi basi kumbukeni kifo chenu cha mara ya mwisho katika hatua hiyo.

Mlishika mkia kundi akiongoza Asec Mimosas. Jeneza lenu liligongwa mabao 19 ya kufungwa na mkifunga mabao 5 yaani mlihusika kuzalisha mabao 24, kati ya mabao 155 ya msimu huo. (Mwananchi Dozi24)

Mwananchi kumbuka dawa ya moto ni moto, amkeni kauwasheni moto, amkeni kawapeni morali wanajeshi wenu, amkeni maana chanjo ya gonjwa lenu la Mwananchi Dozi24 mnayo wenyewe.

Mna Mayele, Morrison, Aziz Ki, Feisal Salum, Gael Bigirimana, Khalid Aucho,  Yanick Bangala na Djuma Shabani amini hao hawatoshi ila ninyi Wananchi mnatosha kuifanya Lupaso iwe Benjamin Mkapa jina la heshima bali machinjio ya Swahiba wenu Ibenge na vijana wake.

Wananchi msiseme maneno matupu 'IWE JUA IWE MVUA ' kumbukeni Kuambizana kuko kusikilizana hapana.

Kila la heri Wananchi kila la heri Young Africans.

Hii ni kalamu ya maskini yenye wino wa DAMU 

John Richard Marwa

@johmasterplan

0717982635

Na Mwandishi Wetu

Kikosi cha wawakilishi bora wa Michuano ya Afrika, ukanda wa Afrika Mashariki na Kati Simba SC kimeondoka alfajiri ya leo kuwafuata De Agosto ya Angola tayari kwa mchezo wa mkondo wa kwanza wa hatua za awali Ligi ya Mabingwa Afrika CAFCL kuwania kufuzu hatua ya makundi.

Simba wameondoka na na Ndege ya kukodi ambayo itawapeleka na kuwatudisha baada ya kucheza hapo kesho kurejea kujiandaa na mchezo wa mkondo wa pili.

Wana Robo Fainali hao wa Kombe la Shirikisho msimu uliopita wameondoka na kikosi cha wachezaji 24 huku wale walioko majeruhi wakisalia kuendelea na matibabu.

Simba wanatarajiwa kushuka dimbani kesho majira ya saa 12 jioni majira ya saa za Afrika Mashariki kuwakabili wenyeji wao De Agosto.

Akizungumza kabla ya kudondoka Kocha Mkuu Juma Mgunda amesema wamejiandaa vema na maandalizi yamekamilika kulingana na aina ya mpinzani wanaenda kucheza nae.

"Maandalizi yamekamilika na tuko tayari kwa ajili ya mapambano, tunatambua nakuheshimu ubora wa wapinzani wetu, tuko tayari kuukabili.

"Katika hatua hizi hakuna mchezo rahisi kama benchi la ufundi na wachezaji tunatambua kuwa jukumu lililoko mbele yetu ni kubwa lakini tunapaswa kufanya vizuri na tuko tayari kwa hilo.

"Kikosi kiko imara ukiachilia vijana wetu watatu, Peter Banda, Jimson Mwanuke ambao walipata kadhi hiyo tulipokuwa Zanzibar na kijana wangu Shomary Kapombe. Wengine wote wako timamu na imara tunaamini wataifanya kazi vyema ya kuiwakilisha Simba na Taifa kwa ujumla." Amesema Mgunda.

Kwa uapnde wa Nahodha John Bocco amesema maandalizi yamekamilika kwa asilimia kubwa na wao kama wachezaji wanafahamu umuhimu wa mchezo ulioko mbele yao.

"Maandalizi yamekamilika kwa ajili ya mchezo ulioko mbele yetu, tunafahamu umuhimu na ugumu wa mechi hii na tumejiandaa kwa hilo.

"Ni hatua kubwa na ngumu lakini kama Simba tunatambua tunapaswa kufanya vizuri Ili kuweza kufuzu hatua ya makundi na kufikia malengo kama Klabu na kuiwakilisha nchi vizuri" amesema Bocco. 

Na Mwandishi Wetu

Na Mwandishi Wetu

NYOTA wa Klabu ya Yanga SC Gael Bigirimana amewaomba mashabiki wa Klabu hiyo kujitokeza kwa wingi kwenye mchezo wao wa kesho dhidi ya Al Hilal ya Sudan.

Yanga watashuka kwenye Dimba la Benjamin Mkapa kuwkaribisha Al Hilal katika mchezo wa kwanza hatua za awali Ligi ya Mabingwa Afrika CAFCL kuwania kufuzu hatua ya makundi kabla ya kurejeana nao mjini Khatoum wiki moja ijayo.

Akizungumza na wandishi wa Habari mchana wa leo Bigirimana amesema kama wachezaji wanafahamu umuhimu wa mchezo huo na wako tayari kupambana na Al Hilal hapo kesho.

"Kama Wachezaji tunafahamu umuhimu wa mchezo huu, tunafahamu una maana gani kwa klabu na mashabiki. Jambo kubwa na la muhimu kwentu ni kuhakikisha kuwa tunaenda kushinda huu mchezo"

"Kutokana na uzoefu wa baadhi yetu ndani ya kikosi tunahimizana jinsi ya kuiwezesha timu iweze kufikia malengo,  tumewatazama wapinzani wetu na tumejua uimara wao na madhaifu yao hivyo tupo tayari." Amesema na kuongeza kuwa.

"Kwa kutambua umuhimu wa mashabiki wetu nawaomba sana wajitokeze kwa wingi waujaze uwanja na kushangilia muda wote wa mchezo na kazi ya matokeo watuachie sisi tutawapatia"

"Natambua tuna mashabiki bora hivyo waje waonyeshe ubora wao katika mchezo mkubwa ambao wao ni muhimu kuwepo" amesema Bigirimana.

Mwisho wa mchezo na kazi ya matokeo watuachie sisi tutawapatia"

"Natambua tuna mashabiki bora hivyo waje waonyeshe ubora wao katika mchezo mkubwa ambao wao ni muhimu kuwepo" amesema Bigir 21imana.

Rais Mstaafu wa Awamu ya Nne wa Jamhuri ya Muungano wa Tanzania Dkt Jakaya Mrisho Kikwete akionesha picha ya Baba yake Mzazi  Mzee Kikwete Mrisho Kikwete a.k.a Khalfani Mrisho Kikwete.

Rais Mstaafu wa Awamu ya Nne wa Jamhuri ya Muungano wa Tanzania Dkt Jakaya Mrisho Kikwete akionesha picha ya mama yake mzazi.

Na Issa Michuzi

Akiwa katika mahojiano katika kipindi maalumu cha kuadhimisha miaka 72 ya kuzaliwa cha  JK72 na watangazaji wa Clouds FM na Clouds TV, Rais Mstaafu wa Awamu ya Nne wa Jamhuri ya Muungano wa Tanzania Dkt Jakaya Mrisho Kikwete akiwa na mkewe Mbunge wa Mchinga Mhe. Mama Salma Kikwete alitumia wasaa huo kuonesha picha za wazazi wake, ikiwa ni pamoja na za Babu yake mzaa baba, Baba Mzazi na Mama Mzazi.

Katika mahojiano hayo yaliyofanyika kijijini Msoga IJUMAA OKTOBA 7, 2022 Dkt. Kikwete alisimulia kwamba Babu yake Mzee Mrisho Kikwete alikuwa Chifu wa Wakwere na kwamba baba yake mzazi Mzee Kikwete Mrisho Kikwete au kwa jina lingine Khalfani Mrisho Kikwete alikuwa Mkuu wa Wilaya Pangani, Same na Tanga katika vipindi tofauti tofauti. Alisimulia kwamba  wakati mama yake alipokuwa mja mzito naye, babu alitamka kuwa ikiwa mtoto atakuwa wa kiume atampatia urithi wa cheo chake, cha Uchifu.

Historia fupi ya Dkt. Jakaya Mrisho Kikwete ni kwamba alizaliwa tarehe 7 Oktoba mwaka 1950 katika kijiji cha Msoga, mkoa wa Pwani, akiwa mtoto wa sita katika familia ya watoto tisa. Alimuoa mama Salma Kikwete mwaka 1989 na wamebarikiwa watoto nane.

Alipata elimu ya msingi na ya kati katika shule za Msoga na St. John Bosco Lugoba kati ya mwaka 1958 na 1965. Aidha, alipata elimu ya sekondari katika shule za sekondari za Kibaha (1966 – 1969) na Tanga (1970 – 1971). Alihitimu Chuo Kikuu cha Dar es Salaam mwaka 1975 na kupata Shahada ya Uchumi, 

Mwaka 1976 alijiunga na Chuo Kikuu cha Maofisa wa Jeshi Monduli na kutunukiwa Cheo cha Luteni Kanali na baadaye kuwa Mkufunzi Mkuu na Kamisaa wa Siasa katika chuo hicho. Mheshimiwa Kikwete amefanya kazi katika Chama cha Mapinduzi kwa nyadhifa mbalimbali kwenye mikoa ya Singida na Tabora na  wilaya za Nachingwea na Masasi.

Mwaka 1988 aliteuliwa kuwa Mbunge na Naibu Waziri wa Nishati na Madini. Mwaka 1990 alichaguliwa kuwa mbunge wa  Jimbo la Bagamoyo na akateuliwa kuwa Waziri wa Wizara ya Maji, Nishati na Madini. Nyadhifa nyingine alizoshika ni Waziri wa Fedha mwaka 1994 na Waziri wa Mambo ya Nje na Ushirikiano wa Kimataifa kuanzia mwaka 1995 hadi 2005.

Alishika rasmi wadhifa wa urais mwaka  2005 na kuchaguliwa tena 2010 kwa muhula mwingine wa  miaka mitano.

Mengine, kama wanavyosema, ni historia. 

Katika kumalizia mahojiano hayo Dkt. Kikwete alibainisha kwamba yuko katika hatua za mwisho mwisho kukamilisha kuandika kitabu cha maisha yake ambacho amesema kitakuwa na kila kitu kinachomhusu.